بقلم :حسام داود
اوضتين وصاله ورزق طيب …
وزوجه صالحه حنينه
وواد وبنت دا كل حلمى
وطلبى الوحيد من ربنا
والستر دايما يكون غطايا
والصحه بس يديمها نعمه
ويباركلى كمان ف رزقى
واى لقمه هتبقى طعمه
حلمى بسيط ومصدقه
بدعوك يا ربي تحققه
وخلى البعيد يكون قريب
والصعبه تبقى هوينه
اوضتين وصاله ورزق طيب
وزوجه صالحه حنينه
انا بدعى ربي وهو عالم
باللى ف ضميرى ونيتى
مادمت بحلم وحلمى طاهر
هيكون معايا ف سكتى
بحلم برزق يكون حلال
واكتب كتاب بنت الحلال
اللى دايما تبقى راضيه
بالقليل وبأى حال
بس يبعد ربي عنى
اى سكه تكون شمال
